माइकिंग याः वःपिं जनजाति नेतात ज्वन

येँ (सन्ध्या टाइम्स)/नेपाल आदिवासी जनजाति महासंघया नेतृत्व लगायत न्हय्म्ह कार्यकर्तायात थनया न्हूसतकं ज्वना यंकूगु विरोधय् थौं जनजाति महासंघं न्हूसतकय् विरोध प्रदर्शन यासें छगू सभा नं यात ।

सभाय् जनजाति महासंघया नायः राजकुमार लेखी नापं थीथी वक्तातय्सं गृहमन्त्रीं राजीनामा बीमाःगु माग यात। गिरफ्तार जूम्ह महासंघया महासचिव आङकाजी शेर्पां प्रहरी प्रशासन लगायत गृहमन्त्री विरुद्ध थौं सभा यानागु खँ 'सन्ध्या टाइम्स'यात कनादिल। जनजाति महासंघया म्हसीकापौ व महासंघया पर्चा क्यनं नं च्वय्या आदेश धकाः थःपिंत ज्वंगु खँ नं वय्कलं कनादिल ।

घटना विवरण कथं वइगु २४ गते जुइगु विश्व आदिवासी दिवस नापं जनजाति महासंघं घोषणा यानातःगु संघर्षया ज्याझ्वः प्रचार यायेगु झ्वलय् मोटरय् च्वनाः माइकिङ याना वयाच्वंगु इलय् प्रहरीं नियन्त्रणय् कयाः वय्कःपिंत गाडी नापं जनसेवाय् यंकूगु खः। प्रहरीं जनजाति महासंघया उपाध्यक्ष इन्दिरागिनि याक्खा, महासचिव आङकाजी शेर्पा, सचिव एशोकान्ती भट्टचन व निम्ह कर्मचारीयात ज्वना यंकूगु खः ।

घौछि तक प्रहरी हिरासतय् तयेधुंकाः जनजाति महासंघया नेतात रत्नपार्कय् वनाः न्हापा क्वःछिनातःगु ज्याझ्वः कथं सभा याःगु खः। वयां लिपा महासंघया नायः राजकुमार लेखीया नेतृत्वय् छगू पुचः हे प्रहरी ज्याकुथी वंगु खःसा अन प्रहरीं वय्कःपिंके क्षमा फ्वनाः त्वःता हःगु खः ।

जनजाति महासंघं विश्व आदिवासी दिवस व जनजाति महासंघं घोषणा यानातःगु लछिया संघर्षया ज्याझ्वः यायेगु झ्वलय् उगु घटना जूगु खः ।