कांग्रेस अधिवेशनय् वडा वडाय् ल्वापु
येँ (सन्ध्या टाइम्स)/नेपाली कांग्रेस महाधिवेशनया झ्वलय् म्हीग जूगु वडा अधिवेशनय् येँया १८ वडाय् कांग्रेस कार्यकर्तातय् दथुइ ल्हाः ल्हाः हे तयाः ल्वापु जुल। थुकिं यानाः अन प्रहरी हे सःतेमाःगु अवस्था वल सा ल्वापुं यानाः उगु वडाय् चुनाव हे स्थगित जू वन। ल्वापुया झ्वलय् कांग्रेस कार्यकर्तात छम्हं मेम्हेसित ल्हाः समेत तःगु खः ।
क्रियाशील सदस्य दुजः गजेन्द्र मानन्धरं कनादी कथं वर्तमान सभापति अम्बर श्रेष्ठ व निवर्तमान सभापति पुरुषोत्तमलाल सिंहं मंकाः रुपं सिफारिस याःपिंत जक क्रियाशील सदस्यता बीगु सहमति दुगु खःसां अम्बर श्रेष्ठ याकःचां हे ३९ म्हेसित सिफारिस यानातःगु व उकियात पुरुषोत्तमलाल सिंह पुचलं केन्द्रय् वनाः रोके यायेवं वहे खँयात कयाः ल्वापु जूगु खः। उगु वडाय् ३५ म्ह क्रियाशील दुजः नवीकरण याःगु खः ।
थुगु अधिवेशनया झ्वलय् येँय् नं आपालं वडाय् देउवा कांग्रेस व कोइराला कांग्रेसया विभेद आपालं पिहां वःगु खनेदु। १८ वडाय् नं थ्वहे ल्वापु पिहां वःगु खः ।
सूत्रं धाः कथं ल्वापुं यानाः १६ वडाया अधिवेशन नं विवादय् लाःगु दु। अन अधिवेशन सिधल धाइपिं व जु हे मजूनि धाइपिनिगु ल्वापु दु ।
उखे येँया दुनेया लागा त्वःताः गामं चुनाव ल्वाः वंम्ह नेता सुरन्द्र मिश्रयात विपक्षी पुचलं लँय् हे पना बिउगु खँ नं धाःगु दु ।
