कास्की-१य् माओवादी उम्मेदवार त्यात, धनुषाय् एमाले त्यात
संविधानसभाया उपनिर्वाचनया धनुषा क्षेत्र नम्बर-५य् एमालेया उम्मेदवार रघुवीर महासेठ त्याःगु दु । महासेठं १३२३०मत त्याकादीगु खसाः वयेकया निकतम प्रपतद्वन्दी तराई मधेश लोकतान्त्रिक पार्टीया श्रीकृष्ण यादवं १२१८९मत हयादीगु खः । राष्ट्रपति रामवरण यादव त्याःगु थ्व निर्वाचन क्षेत्रय् राष्ट्रपतिया काय् चन्द्रमोहन यादव धासा ६०२९मत हयाः स्वंगूगु थासय् लाःगु दु ।
अथहे कास्की क्षेत्र नम्बर १या माओवादी उम्मेदवार कृष्ण गुरुङं नेपाली कांग्रेसया उम्मेदवार दीपक गुरुङ स्वयां स्वीनिगू अप्वः मत हयाः त्यानादीगु दु । कृष्णं १२२५७मत त्याकादीगु खसाः दीपकं १२२२५मत हयाःदीगु ख: । अथेहे एमालेया शालिमराम पौडेलं १११८मत हयादीगु खः ।
कास्कीया लेखनाथ नगरपालिका-१३या जनपाया चौतारोय् च्वंगु व्रम्हरुपा मावी केन्द्रया मेसिनं नेपाली कांग्रेसया शुन्य मत क्यनेवं अन विवाद जूगु खः । विवादया कारणं अन मतगणना निघौ तकःया निंतिं स्थगित जूगु खः । निर्वाचन आयोगया प्राविधिकतय्सं मेसिनं मखुगु खँ मक्यनीगु खँ कन्भिन्स याःगुलिं हाकनं मतगणना यायेत सहतम जूगु कास्की कांग्रेसया सभापति यज्ञबहादुर थापां धयादीगु दु ।
