मनपाय् नेवाः डेस्क संचालन यायेगु सहमति
येँ (सन्ध्या टाइम्स)/नेवाः स्वायत्त राज्य मंकाः संघर्ष समिति व येँ मनपाया दथुइ म्हिगः मनपा ज्याकुथी जूगु वार्तां आवंलि मनपाय् नेवाः ग्वाहालि (हेल्पिङ) डेस्क संचालन यायेगु लगायत न्हय्गू बुँदाया सहमति जूगु दु ।
वार्ताय् मनपाया कर्मचारीतय्त नेवाः भाय् च्वये व ब्वने सयेके बीत स्वलाया तालिम बीगु, तालिम कायेधुंकूपिंत नेवाःतय्गु लागा अर्थात येँया दुनेलागाया वडा ज्याकुथी छ्वयेगु नं सहमति जूगु दु। अथे हे मनपायाके स्वीकृति कयाः तयातःगु होर्डिङ्ग बोर्ड व विज्ञापनय् नेपालभाषा प्रयोग यात धाःसा करय् २५ प्रतिशत अले नेवाः लिपि प्रयोग यात धाःसा ५० प्रतिशत छुट बीगु, नेवाः संस्कृति सम्पदा स्वयेत ब्यागलं कथं मनपाय् विशेष विभाग दयेकेगु, मनपाया सुचं स्थानीय नेपालभाषाया पत्रिकाय् नेपालभाषां बीगु, नेवाः जात्रा, पर्वया निंतिं बजेट तयार यायेत मंकाः संघर्ष समितिं छवाःया दुने हे छगू प्रतिवेदन तयार यायेगु अले वहे प्रतिवेदनया लिधंसाय् बजेट तयेगु व मनपां काइगु करया सवालय् मंकाः संघर्ष समितिं तःगु सुझावयात नं ध्यान बीगु व ईयात ल्वयेक छ्यला वनेगु सहमति नं जूगु दु ।
वार्ताया झ्वलय् कर्मचारी भर्ना प्रक्रिया अनिश्चितकाल तकया निंतिं स्थगित यायेधुंकूगु अवस्थाय् छुं जुयाः अदालतपाखें अन्तरिम आदेश हे वल धाःसां मंकाः संघर्ष समितिलिसे सहलह यानाः जक न्ह्याः वनेगु नापं मंकाः संघर्ष समितिं नं तालं ग्वयातःगु वडाय् आःया निंतिं ताःफ्वः चायेकेगु सहमति जूगु दु ।
येँ मनपाया दलीय संयन्त्रया मध्यस्थताय् जूगु उगु वार्ताय् मनपाया कार्यकारी अधिकृत आनन्दराज पोखरेल, सहायक कार्यकारी अधिकृत दिपक कोइराला, महाशाखा प्रमुख नटनिधि न्यौपानें ब्वति काःगु खः। दलीय संयन्त्रपाखें माओवादीया सर्वोत्तम डंगोल, एमालेया बसन्त मानन्धर, जनमोर्चा नेपालया श्याम प्रसाद मैनाली व नेपाल सदभावना पार्टीया निरन्जन पौडेलं ब्वति कयादीगु खःसा नेवाः स्वायत्त राज्य मंकाः संघर्ष समितिपाखें नायः मंगल महर्जन, सचिवालयया कजि मल्ल के. सुन्दर, दुजःपिं सभासद् दिलीप महर्जन, सानुराजा शाक्य, विपिन महर्जन, उमेश स्थापित, सुजिव बज्राचार्य, गजेन्द्र मानन्धर, नरेशवीर शाक्य, अमृतनारायण मानन्धर, दिलबहादुर श्रेष्ठ, मोहनबहादुर महर्जन, महेन्द्रमान सिंह, राजभाई जकःमि, सत्यनारायण डंगोल, विष्णु चित्रकार, नारायण महर्जन व राजु नापितं ब्वति काःगु खः ।
