पालि भाषाया सफू विमोचन
येँ (सन्ध्या टाइम्स)/नेपाल बौद्ध परियत्ति शिक्षा परियत्ति अनुसन्धान कमिटीया ग्वसालय् विश्व शान्ति विहारय् अनागारिका अग्गञाणी गुरुमांनं च्वयाबिज्यागु 'पालि शिक्षा व संक्षिप्त व्याकरण' सफू धम्मवती गुरुमांनं विमोचन यानाबिज्यात ।
बुद्धधर्मया मूल श्रोतया रुपय् जुयाच्वंगु त्रिपिटक साहित्य लिपिबद्ध जुयाच्वंगु पालि भाषायात सरल रुपं अध्ययन यायेत ग्वाहालि जुइगु थुगु सफूया विमोचन यासें न्हापा थीथी बौद्ध देशय् वनेबलय् अनया भाषा मसःसां पालिभाषा जक सिउसां गाःगु खँ कनाबिज्यात। खुइनिदँ न्ह्यः बुद्धधर्म अध्ययन यायेत बर्मा वनाबलय् पासपोर्ट व भिसा मदयाः पितिनेत्यंगु अवस्थाय् पालिभाषां पौ च्वये सःगुलिं बर्मा प्रशासनं थःत बर्माय् च्वनाः बुद्धधर्मया अध्ययन यायेगु मौका बिउगु खँ नं कनाबिज्यात ।
च्वमि अनागारिका अग्गञाणी गुरुमांनं पालिभाषा अध्ययन यायेगु प्रेरणा भिक्षु प्रज्ञानन्द भन्तेपाखें प्राप्त जूगु खँ कनाबिज्यात। प्रा. भिक्टर प्रधानं पालि भाषा बुद्धधर्म अध्ययन यायेत जक मखुसें थुकियात नेपाल भाषा व नेपाली भाषाया जननी भाषाया रुपय् नं काये जिउगु ख कनादिल ।
भिक्षु ज्ञानपुर्णिक महास्थविरया सभापतित्वय् जूगु उगु ज्याझ्वः शील प्रार्थनां शुरु जूगु खःसा अनुसन्धान कमिटीया संयोजक त्रिरत्न मानन्धर, सदस्य मदनरत्न मानन्धर, रश्मि राजकर्णिकार व प्रकाशक दिलरत्न शाक्यं नं पालि भाषाया महत्व कनादीगु खः ।
