ज्ञानेन्द्र ख्वपय् / सुरक्षाकर्मीतय्सं पत्रकारतय्त दाल
पुलांम्ह जुजु ज्ञानेन्द्र शाह धार्मिक ज्याझ्वलय् ब्वति कायेत सोमवाः ख्वपय् झायादीगु दु । वय्कलं ख्वप चितापोल-७ लटरमेश्वर स्थित महाद्यःया देग निमार्ण व महेन्द्र मावियात उच्च मावि दयेकेत याःगु महायज्ञलय् ब्वति कयादीगु खः । उगु इलय् ज्ञानेन्द्रया समाचार संकलया लागि अन थ्यंकूपिं पत्रकारतय्त सुरक्षाकर्मी व स्थानी ल्याम्हतय्सं दाःगु दु ।
महायज्ञ क्वचायेवं ज्ञानेन्द्रया प्रतिक्रिया कायेत स्वःगु इलय् वय्कया सुरक्षार्थ च्वनाच्वंपिं सुरक्षाकर्मी व यज्ञ व्यस्थापन समितिया मनूतय्सं पत्रकारतय्त दुर्व्यवहार यानाः दाःगु खः । सुरक्षाकर्मीतय्सं पत्रकार महासंघ काभ्रेया सभापति भोला थापा, कान्तिपुरया पत्रकार मनोज बस्नेत लगायत १२म्हेसित दाःगु खःसा एभिन्युज व सगरमाथा टेलिभिजन व कान्तिपुर न्हपौया क्यामरा नं सुरक्षाकर्मीतय्सं तछ्यानाब्यूगु दु ।
घटना लिपा पत्रकार महासंघ काभ्रे शाखां छगू विज्ञप्ति पिथना घटनाया घोर भर्त्सना याःगु दु ।
