मधेशी मोर्चां लिखित प्रतिबद्धता फ्वन
सरकार गठनय् तःधंगु ल्हाः दुगु मधेशी मोर्चां प्रधानमन्त्रीया लागि मौदानय् दुगु निगूलिं दल एनेकपा (माओवादी) व नेपाली कांग्रेसयात लिखित प्रतिबद्धता फ्वंगु दु ।
आइतवाः न्हिनय् सिंहदरवार स्थित तराई-मधेश लोकतान्त्रिक पार्टीया संसदीय ज्याकूथी माओवादी नाप जूगु वार्ताय् माओवादीं मधेशी मोर्चाया अधिंकाश माग पूवंकेत सहमति प्वंकूगु दु । वार्ता लिपा तमलोपाया सहअध्यक्ष हृदेष त्रिपाठीं मोर्चां न्ह्यब्वःगु आधारपत्रया अधिकांश बुँदाय् माओवादीं सहमति प्वंकूगु कनादिल ।
अधिकांश बुँदाय् सहमति लिपा मधेशी मोर्चां माओवादी नाप लिखित प्रतिबद्धता फ्वंगु दु । थुकया बारे पार्टी दुने सहलह यानाः याकनं हे लिसः बीगु खँ माओवादी उपाध्यक्ष नारायणकाजी श्रेष्ठ 'प्रकाशं' कनादिल ।
वार्ताय् मधेशवादी दलतय्सं छगू मधेश छगू प्रदेशया माग ल्ह्वंगु खःसां माओवादीं उकी सहमति यायेमफइगु धासें स्वायत्त मधेश प्रदेश जक बीफइगु खँ धाःगु दु । अथेहे मधेशवादी दलतय्सं नं माओवादी लडाकूया सेनाय् समूहगत प्रवेशय् सहमति प्वंकेमफइगु खँ धाःगु दु ।
अथेहे थौं हे सुथय् कांग्रेस नाप जूगु वार्ताय् नं मधेशी मोर्चां थःपिनिगु आधार पत्रया सम्बन्धय् लिखित प्रतिबद्धता फ्वंगु दु । कांग्रेस महामन्त्री विमलेन्द्र निधी, प्रवक्ता अर्जुननरसिंह केसी व शेखर कोइराला व मोर्चाया शीर्ष नेता दथुइ जूगु वार्ताय् मधेशया सवाल, संविधान निर्माण व शान्ति प्रकृया थंज्याःगु मुद्दाय् कांग्रेसया लिखित धारणा वःसा जक सरकार निर्माणय् वयात ग्वाहालि यायेगु वा मयायेगु बारे निर्णय यायेफइगु खँ जूगु खः ।
