प्रधानमन्त्री नेपाल पाखें राजनीतिक परामर्श
कामचलाउ सरकारया प्रधानमन्त्री माधवकुमार नेपालं आइतवाः थीथी दलया शीर्ष नेतात नाप राजनीतिक परामर्श यानादीगु दु । निगूगु चरणया प्रधानमन्त्रीया निर्वाचन पाखें नं न्हूम्ह प्रधानमन्त्री ल्यये मफेवं वय्कलं थ्व परामर्श न्ह्याकादीगु खः ।
प्रधानमन्त्री नेपालं आइतवाः सुथय् बालुवाटारय् नेपाली कांग्रसेया शीर्ष नेतातय्त नापलानाः न्हूगु राष्ट्रिय सहमतिय सरकार गठनया बारे खँल्हाबंला यानादीगु खः । कांग्रेस कार्यवाहक सभापति सुशील कोइराला, संसदीय दलया नेता रामचन्द्र पौडेल, वरिष्ठ नेता शेरबहादुर देउवा लगायत नेतात उपस्थित दुगु खँल्हाबंलाय् कांग्रेस नेतातय्सं स्वंगूगु चरणया प्रधानमन्त्रीया निर्वाचनय् कांग्रेसयात ग्वाहालि यायेत इनाप याःगु खः ।
उगु इलय् प्रधानमन्त्री नेपालं बहुमतीय सरकार मखसें सहमतिया आधारय् सरकार गठन यायेमाःगु खँय् बः बियादिसें एमालें बहुमतीय आधारय् गठन जुइगु सरकारयात ग्वाहालि मयायेगु निर्णय पार्टी केन्द्रीय कमिटीं यायेधुंकूगु खँ धयादीगु खः ।
थौं हे प्रधानमन्त्री नेपालं राष्ट्रिय जनशक्ति पार्टीया अध्यक्ष सूर्यबहादुर थापा व राष्ट्रिय प्रजातन्त्र पार्टीया अध्यक्ष पशुपति शम्शेर जबरानाप नं लिप्पांगु राजनीतिक अवस्थाया बारे खँल्हाबंला यानादीगु दु । वय्कलं थ्व कामचलाउ सरकार जक जूगुलिं याकनं न्हूगु सरकार गठन जुइमाःगु बारे निम्ह नेतात नाप सहलह यानादीगु खः ।
राजनीतिक परामर्शया झ्वलय् प्रधानमन्त्री नेपालं म्हिग राष्ट्रपति डा. रामवरण यादव नाप नं खँल्हाबंला यानादीगु खः ।
