प्रधानमन्त्री नापं खुम्ह माओवादी नेतातय्त लिखित जवाफ पेश यायेत सर्वोच्चया आदेश
सर्वोच्च अदालतं ब्यूगु आदेशयात सरकारया नेतृत्व यानाच्वंपिं एकीकृत नेकपा (माओवादी)या नेतातय्सं अवहेलना याःगु ठहर यासें झिंन्यान्हू दुने लिखित जवाफ पेश यायेत प्रधानमन्त्री पुष्पकमल दाहाल 'प्रचण्ड' नापं खुम्ह माओवादी नेतातय्त आदेश ब्यूगु दु ।
सरकारया नेतृत्व यानाच्वंपिं नेकपा माओवादीया नेतातय्सं अदालत विरुद्ध प्रचलित कानुन विपरित अदालतया अवहेलना जुइ कथंया ज्या याःगु धासें दायर याःगु रिटया सुनुवाइ यासें अदालतं शुक्रवा: थंज्याःगु आदेश ब्यूगु खः । न्यायाधीश राजेन्द्रप्रसाद कोइरालाया इजलासं माओवादी अध्यक्ष नापं प्रधानमन्त्री प्रचण्ड, माओवादी नेता व अर्थमन्त्री डा. बाबुराम भट्टराई, सचिवालय् दुजः नारायणकाजी श्रेष्ठ, सभासदत शालिकराम जमकट्टेल, चन्द्रबहादुर थापा व एकराज भण्डारीया नांमय् जवाफ पेश यायेत आदेश ब्यूगु खः ।
नेपाली सेनाया च्याम्ह जर्नेलतय् म्याद मतनेगु रक्षा मन्त्रालयया निर्णय कार्यान्वयन मयायेत सर्वोच्च अदालतं सरकारयात आदेश बिवं सर्वोच्चया आदेशप्रति असन्तुष्टि प्वंकूसें न्यायालयया अवहेलना जुइकथं ज्या याःगु धासें पत्रकार मुरारीरान शर्मां अदालत् मुद्दा दायर याःगु खः ।
