कांग्रेस पाखें थीथी वार्ता समिति गठन
प्रधानमन्त्रीया लागि जूगु निगूगु चरणया चुनावं नं प्रधानमन्त्री चयन यायेमफेवं नेपाली कांग्रेसं राजनीतिक दलतनाप सहलह यायेत स्वंगू वार्ता समितित गठन याःगु दु । कांग्रेसं माओवादी, एमाले व मधेशी मोर्चा नाप सहलह यायेत थीथी स्वयंगू वार्ता समिति गठन याःगु दु ।
शनिवाः च्वंगु पाटी पदाधिकारी व केन्द्रय समितिया दुजःतय् बैठकं माओवादी अध्यक्ष पुष्पकमल दाहाल 'प्रचण्ड'नाप वार्ता यायेत उपसभापति प्रकाशमान सिंह, डा. रामशरण महत, दीपकुमार उपाध्याययात जिम्मेवारी ब्यूगु दुसाः थ्वहे वार्ता पुचलं चिचीधंगु वाम दलत नाप नं वार्ता याइ ।
अथेहे एमाले अध्यक्ष झलनाथ खनाल नाप सहलह यायेत पार्टी कार्यवाहक सभापति सुशील कोइराला, प्रधानमन्त्रीया उम्मेदवार रामचन्द्र पौडेल, वरिष्ठ नेता शेरबहादुर देउवा व केन्द्रीय दुजः चिराजीवी वाग्ले दुथ्याःगु पुचः गठन याःगु दु । अथेहे महामन्त्री विमलेन्द्र निधि, केन्द्रीय दुजः डा. शेखर कोइराला, खुमबहादुर खड्का व पार्टी प्रवक्ता अर्जुननरिसंह केसीयात मधेशी मोर्चा नाप वार्ता यायेगु जिम्मेवारी ब्यूगु दु ।
