संसद न्ह्याकेत च्वंगु बैठक निष्कर्षविहिन
एमालें हाकनं संसद बहिष्कार याइगु
व्यवस्थापिका संसद बैठकया गतिरोध चीकेत प्रमुख राजनीतिक दलतय् दथुइ जूगु सहलह निष्कर्षविहीन जूगु दु । शुक्रवाः सभामुख सुवास नेम्वाङया कार्यकक्षय् जूगु प्रमुख दलतय् सचेतकतय् बैठकं छुं निष्कर्ष पिहां वये मफुत ।
माओवादीया प्रमुख सचेतक पोष्टबहादुर बोगटीं संसदया गतिरोध चीकेत सहलह जुयाच्वंगु तर माक्व सहलह जुइ मफूगु खँ धयादीगु दु । उखे प्रमुख प्रतिपक्षि दल नेपाली कांग्रेसया प्रमुख सचेतक लक्ष्मण घिमिरें शनिवाः च्वनीगु बैठक सरकार व माओवादीइ निर्भर जुइगु खँ धयादीगु दु । बुटवल घटनाया बारे प्रधानमन्त्रीं संसदय् लिसः मब्यूतले संसद चलेजुइ मफइगु खँ नं प्रमुख सचेतक घिमिरे कनादिल ।
युथफोस्रया कार्यकर्ता प्रचण्ड थैवया हत्यारायात ज्वने माःगु माग यासें एमालें संसद बैठक बहिष्कार यानावयाच्वंगु दुसा प्रमुख विपक्षि नेपाली कांग्रेसं नं गुंगू बुँदे सहमति कार्यन्वयन मजूगु धासें बैठक बहिष्कार यानाच्वंगु दु । निगू दलं लगातार न्याक्वः तकः बैठक बहिष्कार यायेधुंकूगु दु ।
अथेहे एमाले स्थायी समितिया शुक्रवाः च्वंगु बैठकं प्रचण्ड थैवया हत्यारायात मज्वंतल्ले संसद बहिष्कार यायेगु व मन्त्रीपरिषदया बैठक नं बहिष्कार यायेगु निर्णय याःगु दु । नापं बैठकं थैवया हत्यारायात माओवादीं आश्रय बियातःगु द्वपं ब्यूगु दु ।
