जित ज्वनेत दुःख मयासां ज्यू : खाम
चिनियाँ व्यापारीयात लुटे याःगु व कोटेश्वरया व्यापारी रामहरि श्रेष्ठया हत्याया द्वपं लानाच्वंम्ह माओवादी केन्द्रीय दुजः कालीबहादुर खाम 'विविधं' थः हत्यारा व अपराधी मजूगु धासें थःत ज्वनेत दुःख मयासां ज्यूगु खँ धयादीगु दु ।
येँ नं पिहांवइगु नयाँ पत्रिकायात इमेल मार्फत बियादीगु अन्तर्वार्ताय् वय्कलं गौर, दाङया लमही, नवलपरासी लगायत दर्जनौं हत्याकाण्डया हत्यारातय्त कानुनया घेराय् हःसा थः नं सार्वजनीक जुइगु खँ धयादीगु दु । वय्कलं गौर व दाङ हत्याकाण्डया हत्यारातय्त कानुनया कठघराय् महतल्ले थः भूमिगत हे च्वनीगु खँ धयादिल ।
वय्कलं नियोजित रुपं रामहरि काण्ड व चिनियाँ व्यापारि लुटे याःगु काण्डय् थःगु नां स्वाःना बदनाम यायेत स्वःगु धयादिल । जनमुक्ति शेनाया तत्कालीन स्वंगू डिभिजन प्रमुखया हैसियतं जक थम्हं रामहरि श्रेष्ठ घटनाया नैतिक जिम्मेवारी कयागु धयादिसें उकीया अर्थ थः दोषी जूगु मखु धयादिल ।
अथेहे चिनियाँ व्यापारी लुटे याःगु घटनाय् गणेश मल्ल व मधुसूदन शर्मायात प्रहरीं ज्वना पासविक यातना बियाः थुगु घटनाय् विविधया हे संलग्नता दुगु धकाः धायेकूगु दव्पं नं विविधं बिल । अथेहे प्रहरीं थः च्वनाच्वंगु कोठा धकाः छापा मारे याःगु कोठाय् भिंचा व भिंचा-जिलाजं च्वनेगु यानाच्वंगु व अन प्रहरीं बरामद याःगु निगः ल्यापटप, निगः हार्डहिस्क, सेटलाइट फोन छगू सेट व न्यागू लख जक थःगु जूगु व मेगू यार्सागुम्बा लगायत सामान थःगु मजूगु खँ अन्तर्वाताय् धयातःगु दु ।
निवाः न्ह्यः स्वम्ह चिनियाँ व्यापारी लुटे याःगु धासें प्रहरीं गोंगबु स्थित विविध च्वनाच्वंगु कोठाय् छापा मारे याःगु इलय् चिनियाँ व्यापारी पाखें लुटे याःगु ४ लख, ७ किलो ७ सय ७१ ग्रामया यार्चागुम्बा, इन्सास राइफलया प्यंगू राउण्ड गोली, म्यागनम राइफला निगू राउण्ड गोली, चाइनिज पेस्तोलया छगू राउण्ड गोली, रेन्जर पोस्टया स्ट्याम्प, वन अधिकृत शंकरप्रसाद गुप्ताया स्ट्याप्म लगायत थीथी भ्वँ व ना. १. च. ८७३६ नम्बरया स्यान्ट्रो कार नं बरामद याःगु खः ।
