शिक्षा मन्त्रालय व विद्यार्थी संगठन दथुइ ८ बुँदे सहमति
त्रिभुवन विश्वविद्यालयया प्रविणता प्रमाणपत्र तह खारेज यायेमाःगु माग सहित आन्दोलन यानाच्वंगु विद्यार्थी संगठन व शिक्षा मन्त्रालय दथुइ ८ बुँदे सहमति जूगु दु ।
थीथी राजनीतिक संगठन नाप आबद्ध १३ विद्यार्थी संगठन व शिक्षा मन्त्रालय दथुइ शुक्रवाः जूगु वार्ताय् प्रमाणपत्र तह खारेज यायेगु लगायत ८ बुँदे सहमति जूगु दु । अथेहे प्रत्येक निर्वाचन क्षेत्रय् छगू उच्च मावि स्थापना यायेगु व छगू सामुदायिक उच्च मावि चायेकेगु विषयलय् सहमति जूगु दु ।
शिक्षा मन्त्रालयया सहसचिव जनार्दन नेपालया संयोजकत्वय् गठित वार्ता पुचः नाप जूगु खँल्हाबंलाय् प्रत्येक उच्च माविलय् ३म्ह शिक्षक दरबन्दी बीगु सहमति नं जूगु दु । अथेहे शिक्षा नियमावलीया मापदण्ड आधारय् उच्चमाविलय् दच्छिया छक शिक्षक अप्वयेकीगु, विद्यार्थी सहितया पुचलं उच्च माविया अनुगमन यायेगु, कर्चमारी व्यवस्था यायेगु लगायत सहमति नं जूगु दु ।
विद्यार्थीतय्सं प्रमाणपत्र तह खारेजी यायेमाःगु लगायत माग यानाः आन्दोलन यानाच्वंगु खः ।
