मनपाय् कर्मचारी भर्ना प्रक्रिया स्थगित
येँ (सन्ध्या टाइम्स)/अन्ततः नेवाः आन्दोलनया बलं येँ महागरपालिकाय् कर्मचारी भर्ना प्रक्रिया अनिश्चितकाल तकया नितिं स्थगित जूगु दु ।
नेवाः स्वायत्त राज्य मंकाः संघर्ष समितिया आह्वानय् नेवाःत आन्दोलनय् कुहां वःगुलिं मनपाया पदपूर्ति विभागं कर्मचारी भर्ना प्रक्रियायात अनिश्चितकाल तकया निंतिं स्थगित याःगु खः। महानगरपालिकाया पदपूर्ति समितिं म्हिगः सनिलय् भर्ना प्रक्रिया मेगु सुचं मवःतलेया नितिं स्थगित यानागु सुचं तिकूगु खः ।
न्हापा घोषणा यानातःगु ज्याझ्वः कथं महानगरपालिकां थौं न्हूपिं कर्मचारी भर्नाया नितिं राष्ट्रिय सभागृहया पदपूर्ति विभागय् अन्तर्वार्ता कायेत्यंगु खः। तर नेवाः स्वायत्त राज्य मंकाः संघर्ष समितिं थौं हे बसन्तपुलिं छगू जुलुस पिकयाः राष्ट्रिय सभागृह हे घेरे यायेगु धकाः ज्याझ्वः दयेका तःगुलिं मनपां थौंया अन्तर्वार्ता नापं स्थगित याःगु खः ।
बसन्तपुली जुलुस व नेवाः सभा
येँ (सन्ध्या टाइम्स)/येँ मनपां अनिश्चितकालया नितिं कर्मचारी भर्ना प्रक्रिया स्थगित यायेवं नेवाः स्वायत्त राज्य मंकाः संघर्ष समितिं न्हापा घोषणा यानातः कथं जुलुस नापं वनाः राष्ट्रिय सभागृहय् धर्ना च्वनेगु ज्याझ्वःयात हीकाः बसन्तपुली तुं सभा याःगु दु। थौं सुथय् बसन्तपुलिं पिकाःगु जुलुस थीथी लागा चाःहिलाः बसन्तपुली तुं सभा यानाः क्वचायेकूगु खः। सभाय् मंकाः संघर्ष समितिया नायः मंगल महर्जन व सचिवालयया कजि मल्ल के.सुन्दरं कर्मचारी भर्ना प्रक्रिया महानगरपालिकां स्थगित जक मखु खारेज हे यायेमाः धकाः न्ववानादीगु खः ।
