नेवाः पत्रिकातय्त मनपाया ग्वाहालि
येँ (सन्ध्या टाइम्स)/येँ महागरपालिकाया नेवाः जाति उत्थान कोषपाखें थौं छगू समारोह यासें नेवाः भासं पिहां वइगु न्हिपौ व वाःपौतय्त आर्थिक ग्वाहालि लःल्हाइगु जूगु दु ।
ज्याझ्वलय् नेपालभाषा न्हिपौ 'सन्ध्या टाइम्स', 'झीगु स्वनिगः'यात न्यय्द्वः तका, 'अप्सरा' वाःपौयात नीद्वः तका, 'देसय्मरु झ्याः' वाःपौयात झिद्वः तका बीगु खँ सीदुगु दु ।
नेवाः जातिया उत्थानया निंतिं नेवाः भाय्या संचार माध्यमं महत्वपूर्ण भूमिका म्हिता वयाच्वंगुलिं उमित आर्थिक ग्वाहालि कथं मनपां थ्व दां लःल्हायेत्यंगु खः ।
अथे हे नेवाः संस्कृति, जाति, संगीत नापं थीथी ख्यलय् योगदान याना वयाच्वंगु थीथी खलः पुचःयात नं मनपां आर्थिक ग्वाहालि याइगु ग्वसाः दु। थौंया ज्याझ्वलय् नेवाः स्यनामि गुथि, नेपालभाषा इन्ष्टिच्युट, नेवाः सांस्कृतिक बाजागाजा गुथियात नं आर्थिक ग्वाहालि लःल्हाइगु खँ सीदुगु दु ।
