चलखं ल्हानाः छखा हे छेँया प्यम्ह मंत
येँ (सन्ध्या टाइम्स)/निन्हु स्वन्हु न्ह्यवंनिसें मदिक्क वयाच्वंगु वां चलः वनाः छेँ दुना वःगुलिं सल्यानय् छखा हे छेँया प्यम्ह मनू ल्हानाः सीगु दु ।
वंगु चान्हय् सल्यानया सिनबाङ गाविसया छापनेटा धइगु थासय् चलः वनाः थ्व मनूत सीगु खः। उगु चलखय् लानाः ६० दँया केशवबहादुर साहु, वय्कःया जहान चन्द्रकली साहु, काय कमल साहु व च्यादँ दुम्ह काय सीगु खँ प्रहरीं धाःगु दु ।
इलाका प्रहरी ज्याकू लमहीपाखें वंगु प्रहरीया पुचलं चलः वनाः छेँ दुनावंगु लागाय् उद्धारया ज्या न्ह्याकाच्वंगु दु। थौं सुथंनिसें न्ह्याकूगु उगु उद्धार यायेगु ज्याय् स्थानीय मनूतय्सं नं ग्वाहालि यानाच्वंगु दु। चलः वनाः दुनावंगु उगु छेँय् मेमेपिं नं ल्हानाच्वंगु दयेफु धकाः अनुमान यानाः मालेगु ज्या जुयाच्वंगु दु ।
चान्हय् द्यनाच्वंगु इलय् वंगु चलखं ल्हानाः प्यम्हं हे छेँजःपिं सीगु खः ।
