धमलायात तारेखय् त्व:तेत आदेश
पुनरावेदन अदालत यलं रिपोटर्स क्लबया अध्यक्ष ऋषि धमलायात साधारण तारेखय् त्व:तेत जिल्ला प्रशासन कार्यलययात आदेश ब्यूगु दु । शुक्रवाः न्यायाधीशत आनन्दमोहन भट्टराई व मोहनप्रसाद घिमिरेया मंका इजलासं धमलायात कुनात्येमाःगु आधार मदुगु धासें साधारण तारेखय् त्वतेत आदेश ब्यूगु खः ।
जिल्ला प्रशासन ज्याकू येँय् नं फागुनय् हात हतियार खरखजना ऐन अन्तर्गत धमलायात कुनेत आदेश ब्यूगु खः । पुनरावेदन अदालतं उकीयात बदर याःगु दु । येँय् प्रशासनं याःगु निर्णय बदर यायेमाःगु माग यासें धमलां चैत २ गते यल अदालतय् निवेदन त:गु खः ।
धमलाया पाखें अधिवक्तत विश्वकान्त मैनाली, शम्भु थापा, भिमार्जुन आचार्य, माधव बाँस्कोटा, विष्णु भट्टराई लगायत छगू दर्जन वकिलतय्सं बहस याःगु खः । अथेहे सरकारया पाखें सरकारी वकिलत चन्द्र प्रकाश सापकोटा, ऋषिराम दवाडी व बज्रेश कुमार प्याकुरेलं बहस याःगु खः । धमला नापं ज्वंपिं पत्रकारत रामशुभक महतो, वीरेन्द्र केएम व मनोज महतोयात धासाः अदालतं जिल्ला अदालतया हे निर्णय ठीक जू धाःगु दु ।
