निगूगु चरणय् नं प्रचण्ड व पौडेल पराजित
प्रधानमन्त्री पदया निंतिं शुक्रवाः जूगु निगूगु चरणया मतदानय् नं निम्हं उम्मेदवार पराजीत जूगु दु । नेकपा (एमाले) व मधेशी मोर्चां छुं नं दलया उम्मेदवारयात समर्थन मयायेवं माओवादी व कांग्रेसं स्पष्ट बुहमत ह्येमफेवं हानं मेगू चरणया निर्वाचन जुइगु जूगु दु । माओवादी पाखे प्रधानमन्त्रीया निंतिं उम्मेदवार जुयादीम्ह अध्यक्ष पुष्पकमल दाहाल 'प्रचण्ड' व कांग्रेसया उम्मेदवार रामचन्द्र पौडेलं बहुमत ह्येमफेवं निम्हेसियां प्रस्ताव अस्वीकृत जूगु खः ।
शुक्रवाः जूगु निर्वाचनय् प्रचण्डं २४१ मत प्राप्त याःगु खःसा विपक्षय् १२३ मत वःगु खः । पौडेलया पक्षय् १२३ मत व विपक्षय् २४१ मत वःगु खः । ५७८ सभासद् उपस्थित दुगु निर्वाचनय् २१४ सभासद्त तटस्थ च्वंगु खः । थौंया निर्वाचनय् निम्हं उम्मेदवारं बुधवाः जूगु निर्वाचनय् स्वयां छगू-छगू मत कम प्राप्त याःगु खः ।
माओवादी व कांग्रेसं प्रधानमन्त्रीया निंतिं थःथःगु पक्षय् सहमति यायेत स्वयाच्वंगुलिं न्याघौ लिबाक न्ह्याःगु संसदया बैठकं नं प्रधानमन्त्री चयन यायेमफेवं स्वंगूगु चरणया निर्वाचन साउन १७ गते जुइगु जूगु दु ।
