हत्याया विरोधय् तुलसीपुर बन्द

बिहीवाः बहनी सामुदायिक एफएम रेडियो तुलसीपुरया संचालक समितिया अध्यक्ष देवप्रसाद धितालयात गोलीं क्येकाः हत्या याःगु विरोधय् शुक्रवाः दाङया तुलसीपुर बन्द याःगु दु । शुक्रवाः सुथय् च्वंगु तुलसीपुर उद्योग वाणिज्य संघया आकस्मीक बैठकं हत्याया विरोधय् बन्दया आह्वान याःगु खः । धितालयात बिहीवाः बहनी उरहरी-४ हेमनगरय् मोटरसाइकलय् च्वनाः वःपिं प्यम्हेसिनं गोलीं क्येकाः स्याःगु खः । न्यादँ न्ह्यः निसें रेडियो तुलसीपुरया संचालक समितिया अध्यक्ष जुयादीम्ह धितालया जाहान नापं निम्ह म्ह्याय् दु ।