ग्वाहालि यायेत चिचीधंगु दलयात माओवादीया इनाप
एकीकृत नेकपा (माओवादीं) थीथी चिधंगु दलया नेतातय्त नापलाना कन्हय् जुइगु प्रधानमन्त्रीया निर्वाचनय् थःगु पार्टीयात समर्थन यायेत इनाप याःगु दु ।
माओवादी अध्यक्ष पुष्पकमल दाहाल 'प्रचण्ड' लगायत उपाध्यक्ष नारायणकाजी श्रेष्ठ 'प्रकाश', विदेश विभाग प्रमुख कृष्णबहादुर महारा व केन्द्रीय दुजः वर्षमान पुन 'अनन्तं' बिहीवाः राष्ट्रिय प्रजातन्त्र पार्टीया अध्यक्ष कमल थापायात नाप खँल्हाबंला याःगु दु । संविधानसभाय् प्यंगू सिट दुगु राप्रपा नापया खँल्हाबंलाय् माओवादीं थःत समर्थन यायेत इनाप याःगु खः ।
राप्रपा नेपालया संसदीय ज्याकूथी जूगु खँल्हाबंलया झ्वलय् राप्रपा नेपालया अध्यक्ष थापां उपयुक्त इलय् उचित निर्णय यायेगु खँ माओवादी नेतातय्त न्यंकूगु खः । वय्कलं थःपिं तटस्थ मच्वनेगु धयादिसें शान्ति व संविधानया सुनिश्चितताया विश्वास बीगु पार्टीयात भोट बीगु खँ धयादीगु खः ।
अथेहे माओवादी अध्यक्षं प्रचण्डं सद्भावना (आनन्दीदेवी) पार्टीया अध्यक्ष सरिता गिरीयात नं नापलानाः निर्वाचनय् ग्वाहालि यायेत इनाप याःगु खःसा सद्भावनां माओवादीयात समर्थन यायेगु धाःगु खँ सीदुगु दु ।
माओवादीं थौं हे जनमुक्ति पार्टीया नेतातय्त नं नापलाना खँल्हाबंला याःगु दुसाः उगु इलय् जनमुक्ति पार्टीया नेतातय्सं समर्थन यायेगु व मयायेगु बारे छुं नं लिसः मब्यू ।
