एमाले तटस्थ च्वनीगु
कन्हय् जुइगु प्रधानमन्त्रीया निगूगु चरणया निर्वाचनय् नेकपा (एमाले) तटस्थ च्वनीगु जूगु दु ।
बिहीवाः पार्टी मुख्यालय बल्खुइ छगू पत्रकार सम्मेलन यासें पार्टी अध्यक्ष झलनाथ खनालं राष्ट्रिय सहमति मजुतल्ले बहुमतीय सरकार निर्माणया निंतिं एमालें सुयातं समर्थन मयाइगु धयादिल । वयकलं धयादिल, 'राष्ट्रिय सहमतिया सरकार गठन जुइगु वातावरण जुसाः जक एमालें न्हूगु लिसः बी, बहमुतया निंतिं सुयातं समर्थन याइमखु ।'
वय्कलं एमाले केन्द्रय कमिटीया निर्णय पुर्नविचार मजुइगु धयादिसें बहुमतीय आधारय् प्रधानमन्त्री चयनया निंतिं कन्हय् जुइत्यंगु निर्वाचन पाखें नं प्रधानमन्त्री चयन मजुइगु दाबी यानादिल । कन्हय् जुइगु निर्वाचनय् नं दुर्घटनाग्रस्त जुइगु बिचाः प्वंकादिसें खनालं एमालें राष्ट्रिय सहमतिया लागि बहुमत दुगु एमाले नेतृत्वया सरकारं राजीनामा ब्यूगु धयादिल ।
थःगु पक्षय् दुई तिहाइ बहुमत खाके मफेवं प्रधानमन्त्रीया उम्मेदवारी लित काःगु खनालं थम्ह पार्टी निर्णययात कार्यन्वयन यानागु धयादिल । वय्कलं थुकीया बारे पार्टी दुने छुं नं कथंया विवाद मदुगु दावी नं यानादिल ।
