'माओवादी व एमाले निगूलिं पार्टीं ग्वाहालि याइ'
नेपाली कांग्रेसया कार्यवाहक सभापति सुशील कोइरालां कन्हय् जुइगु प्रधानमन्त्रीया निर्वाचनय् कांग्रेसया उम्मेदवार रामचन्द्र पौडेलयात एनेकपा (माओवादी) व नेकपा (एमाले) निगूलिं पार्टीं ग्वाहालि याइगु खँ धयादीगु दु ।
बीपी स्मृति दिवसया झवलय् बिहीवाः कांग्रेस मू ज्याकू सानेपाय् जूगु ज्याझ्वः लिपाः पत्रकारत नाप खँल्हाबंला यानादिसें कोइरालां पौडेलया पक्षय् समर्थन खाकेत थीथी दलया नेतात नाप सहलह जुयाच्वंगु धयादिसें कन्हय् मतदान जुइगु इलय् दकलय् तःधंगु दल माओवादी व एमालें कांग्रेसयात ग्वाहालि याइगु धयादिल ।
वय्कलं माओवादी नेतृत्वया सरकार गठन जूगु इलय् माओवादीयात कांग्रेसं रचनात्मक रुपं ग्वाहालि याःगु व एमाले नेतृत्वया सरकार गठन जूगु इलय् कांग्रेस उगु सरकारय् ब्वति कयाः ग्वाहालि याःगुलिं निगूलिं पार्टीं पौडेलया समर्थन याइगु विश्वास प्वंकादिल ।
