उपनिर्वाचनं देय्यात न्हूगु लँपू क्यनीगु : कोइराला

नेपाली कांग्रेस व पुलांम्ह प्रधानमन्त्री गिरिजाप्रसाद कोइरालां संविधान सभा उपनिर्वाचनं देय्यात न्हूगु लँपू क्यनीगु खँ धयादीगु दु । वयेकलं उपनिर्वाचनया तधंगु महत्तव दगु व थ्व निर्वाचनं देय्यात न्हूगु राजनीतिक लँपू क्यानी धयादिल ।

उपनिर्वाचनय् मतदान यायेधुंकाः पत्रकारतलिसे खँल्हानादिसें सभापति कोइरालां धयादिल - 'निर्वाचन चिधंगु जुसां थुकी देय्यात न्हूगु राजनीतिक लँपू क्यनीगुलिं थुकीया तःधंगु महत्तव दु ।' तर वयेकलं गज्याःगु लँपू धासाः धयामदी । अथेहे वयेकलं उपनिर्वाचनं पार्टीतय् गतिविधिया मुल्याङकन याइ धयादिल ।

पुलांम्ह प्रधानमन्त्री कोइरालां मोरङ्ग क्षेत्र नं ७या आदर्श उच्च मावि मतदान केन्द्रय् वनाः मतदान यानादीगु खः ।