प्रधानमन्त्री ल्यज्या जुइमफुत, मेगु ल्यज्या ७ गते
व्यवस्थापिका संसदय् प्रधानमन्त्रीया लागि जूगु निर्वाचनय् एकीकृत नेकपा माओवादी व नेपाली कांग्रेसं स्पष्ट बहुमत खाके मफुसेंलि बुधबार प्रधानमन्त्री ल्यज्या जुइमफुत । एमालें धाःसा अन्तिम इलय् वयाः थःगु उम्मेदवारी लित काःगु खः ।
संसदमा उपस्थित ५९७ सभासद मध्ये माओवादी अध्यक्ष प्रचण्डया पक्षय् २४२ (माओवादी सभासद व मेगु न्यागू मत), विपक्षय् ११४ (नेपाली काँग्रेस जक), तटस्थ २३६ (एमाले लगायत मेगु दल) मत कुतुंवंगु खः ।
नेपाली काँग्रेसया रामचन्द्र पौडेलयात जूगु प्रस्तावया पक्षय् १२४, विपक्षय् २३५ व तटस्थय् २२८ मत खाःगु खः ।
नेकपा एमालें न्ह्यब्वःम्ह पार्टी नायः झलनाथ खनालयात प्रधानमन्त्रीया उम्मेदवारय् प्रस्तावक जुयादीम्ह प्रधानमन्त्री माधबकुमार नेपालं ४०१ मत मथ्यवं प्रस्ताव लितकयादीगुलिं थौं ल्ययेमाःगु प्रधानमन्त्री सुं नं क्वःमजिल ।
व्यवस्थापिका संसदया मेगु मुँज्या साउन ७ गते तकया लागि दिकूगु दुसा उबलें हाकनं प्रधानमन्त्री ल्ययेगु धाःगु दु ।
