थौं नां दर्ता कन्हय् चुनाव
येँ (सन्ध्या टाइम्स)/संघीय गणतान्त्रिक नेपाःया स्वम्हम्ह प्रधानमन्त्री ल्ययेत संसदय् थौं उम्मेदवारतय्गु नां दर्ता याइगु ज्याझ्वः दु। प्रधानन्त्रीया उम्मेदवार जुइपिनिगु नां थौं ११ बजेनिसें सनिलया ५ बजे तक दर्ता यायेमाः ।
उम्मेदवार जुइपिनि नांधलः पिकयाः कन्हय् हे मतदान याकी। छुं जुयाः निम्हं मल्याक उम्मेदवार दत धाःसा इमि दथुइ चुनाव जुइ। सुनां नं ३०१ मत थ्यंके मफुत धाःसा अप्वः मत हपिं निम्हेसिया दथुइ हाकनं मतदान याकी।
प्रधानमन्त्री माधव नेपालं राजीनामा बियादी धुनेवं राष्ट्रपति डा. रामबरण यादवं वंगु २८ गते हे बहुमतीय प्रणालीं प्रधानमन्त्री ल्ययेत संसदयात पौ छ्वःगु खः। अन्तरिम संविधानया धारा ३८ या २ कथं प्रधानमन्त्री ल्ययेत बहुमतीय प्रणालीइ वंगु खः। व सिबें न्ह्यः अन्तरिम संविधानया धारा ३८ या १ कथं सहमतीय प्रणाली कथं प्रधानमन्त्री ल्ययेत झिंनिन्हुया म्याद बियादीगु खःसा उगु म्यादया दुने सहमतीय आधारय् न्हूम्ह प्रधानमन्त्री ल्ययेगु ज्या दलतय्सं याये मफयेवं बहुमतीय प्रणालीइ वंगु खः ।
एमालेय् कालबिल
एमालेय् प्रधानमन्त्रीया उम्मेदवार कथं पार्टी अध्यक्ष झलनाथ खनालया नां चर्चाय् वयाच्वंगु दु। तर पार्टी दुने धाःसा वय्कःयात समर्थन यायेगु खःसा ३ नम्बरय् लाःम्ह उपाध्यक्ष विद्या भण्डारीयात कार्यकारी अध्यक्ष बीमाःगु व केपी ओलीयात संविधानसभाय् दुत हयेमाः धकाः ओलीं म्हिगः प्रस्ताव तःगु खँ सीदुगु दु ।
