बलम्बुइ ज्ञानमाला व बुद्ध पुजा
येँ (सन्ध्या टाइम्स)/वंगु शनिवाः स्वयम्भु ज्ञानमाला भजन खलःया सत्याम्ह बौद्ध धर्मालम्बीतय्सं बलम्बुया पुलांगु विहार प्रणिधिपूर्ण महाविहारय् तःजिक बुद्ध पुजा यात ।
ने.सं. १०६७ सालय् बलम्बुया नेवाः बौद्धमार्गीतय्सं खुसः तका ध्यबा मुनाः करिब स्वगू रोपनी जग्गा न्यानाः उगु महाविहार पलिस्था याःगु खः ।
प्रणिधिपूर्ण महाविहारया सञ्चालक सुक भन्तें पञ्चशील व अष्टशील पाठ यानाः न्ह्याःगु उगु बुद्ध पुजाय् स्वयम्भु ज्ञानमाला भजन खलःया दुजःतय्सं ब्वति कयादीगु खःसा बुद्ध पुजा धुंकाः सुक भन्तेपाखें प्रवचन बियाबिज्याःगु खः।
वसपोलं थौंकन्हय् उगु विहारयात विशेष यानाः बृद्धाश्रम कथं विकास यानाच्वनागु खँ कनाबिज्यात। उगु विहारय् सुं नं वृद्धवृद्धां प्यंगू लाख दांया ग्वाहालिं म्वानाच्वंत्तले नयेगु, च्वनेगु, सुसाःकुसाःया विशेष व्यवस्था जुइगु खँ नं वसपोलं कनाबिज्यात ।
उगु हे इलय् प्रणिधिपूर्ण महाविहारया निर्माण ज्याया निंतिं स्वयम्भु ज्ञानमाला भजन खलःया नायः रत्नबहादुर राजकर्णिकारपाखें अन झाःपिं सकसितं ग्वाहालि यायेत इनाप याः कथं मुक्कं १५,३९१ तका दां मुंगु खःसा उगु दां सुक भन्तेयात लःल्हाःगु खः ।
