प्रचण्ड, पौडेल व खनाल दथुइ त्रिपक्षीय भिडन्त
सहमतिय आधारय् न्हूगु राष्ट्रिय सरकार गठन यायेगु खँय् बः बियाच्वंगु स्वंगू प्रमुख दलं थःथःगु दलया शीर्ष नेतातय्त हे प्रधानमन्त्रीया उम्मेदवार कथं न्ह्यने हःगु दु । एनेकपा (माओवादीं) अध्यक्ष पुष्पकमल दाहाल 'प्रचण्ड'， नेपाली कांग्रेसं उपसभापति रामचन्द्र पौडेल व नेकपा (एमालें) अध्यक्ष झलनाथ खनालया नां प्रधानमन्त्रीया उम्मेदवार कथं मंगलवाः संसदया सचिवालय् दर्ता याःगु दु ।
न्हूगु सरकारया नेतृत्वया विकल्प खुल्ला यानातःगु माओवादीया मंगलवाः च्वंगु पोलिटब्यूरोया बैठकं पार्टी अध्यक्षयात हे प्रमया उम्मेदवार दयेकेगु निर्णय याःगु खः । बैठक क्वचायेवं संसद भवन थ्यंकाः अध्यक्ष प्रचण्ड नापं माओवादी नेतातय्सं अध्यक्षया नां दर्ता याःगु खः । थ्वस्वयां न्ह्यः माओवादीं सहमति मजुसाः खनाल नेतृत्वयात समर्थन यायेगु व वामपन्थी शक्तित दथुइया सहकार्यय् न्हूगु सरकार गठन यायेगु विकल्प तयातःगु खः ।
कांग्रेसं छुं ई न्ह्यः हे पार्टीया संसदीय दलया नेताया हिसाबं रामचन्द्र पौडेलयात पार्टी पाखें प्रधानमन्त्रीया निंतिं उम्मेदवार घोषणा याःगु खः । पौडेलं नं मंगलवाः संसदीय सचिवालयलय् वनाः थःगु नां दर्ता याकूगु दु ।
अथेहे एमालें प्रधानमन्त्रीया निंतिं थःगु पार्टी पाखें अध्यक्ष झलनाथ खनालयात उम्मेदवार दयेकीगु निर्णय याःगु दु । मंगलवाः च्वंगु एमालेया केन्द्रीय कमिटीया बैठकं खनालयात उम्मेदवार दयेकीगु निर्णय याःगु खः । तर बैठकं यदि प्रमया निंतिं मतदान जूगु इलय् तक एमालेया पक्षय् दुई तिहाइ बहुमत वइगु निश्चित मजुसाः उम्मेदवारी लितकायेगु निर्णय याःगु दु ।
