२२दल नापया सहलह लिपा जक मधेशी मोर्चां निर्णय याइगु

सरकार गठनय् प्रमुख ल्हाः दुगु मधेशी मोर्चां संविधानसभाय् दुथ्याःगु २२ दल नापया सहलह लिपा जक थःगु आधिकारीक धारणा दयेकीगु जूगु दु । मंगलवाः मोर्चा नाप आवद्ध प्यंगू मधेशवादी दलया नेतात दथु्इ प्यघौ तक न्ह्याःगु बैठकं २२ दल नाप सहलह यानाः जक सरकार गठनया बारे निर्णय यायेगु खँ क्वःछिउगु दु ।

थौं न्हिनसिया ३ बजे २२ दलया बैठक च्वनेत्यंगु दुसाः उगु हे बैठक मधेशवादी दलतय्सं प्रमुख दलत दथुइ सहमति मजूगुलिं मधेशी नेतायात प्रधानमन्त्रीया उम्मेदवार दयेकीगु व उकी समर्थन यायेत मेमेगू दलयात इनाप याइगु खँ धाःगु दु । मधेशी जनअधिकार फोरम नेपाल, मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी व सद्भावना पार्टी दथुइया बैठकय् तमलोपाया अध्यक्ष महन्त ठाकुरयात प्रमया उम्मेदावर दयेकीगु सहलह जुसां छुं निर्णय धाःसा यायेमफुत ।