चलः वनाः छखाः हे छेँया झिम्ह बेपत्ता

वंगु चान्हय् चलः वनाः डोल्पाया छखाः हे छेँया झिम्ह बेपत्ता जूगु दु । डोल्पाया लहा गाविस वडा नं १०या करणघाटय् वंगु चलःया कारणं स्थानीय लालबहादुर रोकायया छेँ चुइकायंकूगु खः । रोकायया छेँ चुइकायंकाः रोकाय नापं झिम्ह बेपत्ता जूगु दु । रोकायया छेँ नापसं च्वंगु मेगू झिंखुखा छेँ नं चुइकायंकूगु दुसाः उगु छेँया दक्वं मनूत बिस्यू वनाः ज्यान जोगे यायेत ताः लाःगु दु ।

चलः वनाः करणपुरय् हे च्वंगु प्रहरीया ज्याकू नं चुइकाः यंकूगु दुसाः प्रहरी ज्याकू दुने दुपिं प्रहरीत नं अनं बिस्यू वनाः ज्यान जोगे यायेत सफल जूगु दु । आः अन जाजरकोटं वंपिं प्रहरी पुचलं उदार यायेगु ज्या न्ह्याकाच्वंगु दु ।