दलत आन्तरिक गृहकार्यलय्
प्रधानमन्त्री निर्वाचनया उम्मेदवार दर्ता यायेत छुं घौ जक ल्यं दुगु इलय् दलत आन्तरिक गृहकार्यलय् व्यस्त जूगु दु । एकीकृत नेकपा (माओवादी), नेकपा (एमाले) लगायत मधेशी मोर्चा बिस्कं बिस्कं बैठक च्वनाः प्रधानमन्त्रीया उम्मेदवारया बारे सहलह यानाच्वंगु दु ।
माओवादी पोलिटब्यू्रो बैठकय् आः थःगु पार्टीया उम्मेदवारी दर्ता यायेगु वा एमाले अध्यक्ष झलनाथ खनालया समर्थन यायेगु बारे सहलह जुयाच्वंगु दु । सुथय् ९ बजे हे बैठक च्वनीगु धकाः ई क्वःछिउगु खःसां माओवादीं एमालेया निर्णय पियाच्वंगुलिं छुं ई न्ह्यः जक बैठक शुरु जूगु खः । बैठक च्वने स्वयां न्ह्यः सुथय् माओवादी अध्यक्ष पुष्पकमल दाहाल 'प्रचण्ड' व उपाध्यक्ष डा. बाबुराम भट्टराई दथुइ खँल्हाबंला जूगु दु ।
खँल्हाबंलाया बारे निम्हं नेतातय्सं छुं प्रतिक्रिया मब्यूसां निम्ह नेतात दथुइ पोलिटब्यूरो बैठकयात विवाद रहित दयेकेगु बारे खँल्हाबंला जूगु खँ सिदुगु दु । भट्टराईया शान्तिनगर स्थित छेँय् निम्ह नेतात दथुइ खँल्हाबंला जुइ न्ह्यः वय्पिंसं कांग्रेस नेता अमरेश कुमार सिंह नाप नं खँल्हाबंला यानादीगु खः ।
उखे मदन नगर बल्खुइ एमालेया केन्द्रीय कमिटीया बैठक च्वनाच्वंगु दु । कांग्रेस नेतृत्वयात स्वीकार यायेगु वा थःगु हे नेतृत्वय् दुई तिहाइ बहुमत सहित सरकार गठन यायेगु बारे संस्थापन पक्ष व ओली पक्ष दथुइ खँ मिले मजुइवं सोमवाः बैठक बिना निष्कर्ष क्वचाःगु खः । आः च्वनाच्वंगु बैठकं थुकीया बारे निर्णय याइगु खँ धाःसां पार्टी दुने निगू गुटया विवाद खनेदगुलिं एमालें याकन हे निर्णय याइगु सम्भावना तसकं म्हो जक दु ।
सरकार गठनय् प्रमुख ल्हाः दुपिं मधेशवादी दलत नं आः थःथःगु आन्तिरक बैठकय् व्यस्त जुयाच्वंगु दु । स्वंगू प्रमुख दलं प्रधानमन्त्रीया निंतिं सहमति यायेमफुगुलिं मधेशावदी दलतय्सं नं थःगु हे उम्मेदवार दर्ता याइगु सम्भावना दुगु खँ धाःगु दु ।
