एमाले बैठक निष्कर्षविहीन
न्हूगु सरकारया बारे निर्णय यायेत च्वंगु नेकपा (एमाले) केन्द्रीय कमिटीया बैठक बिना निष्कर्ष क्वचाःगु दु । सोमवाः एमाले मू ज्याकू मदन नगर बल्खुइ ६ घण्टा तक न्ह्याःगु बैठकय् केन्द्रीय दुजःतय्सं न्ववायेगु ज्या क्वमचाःगुलिं बैठकं छुं निर्णय यायेमफइगु खँ धाःगु दु ।
बैठकय् न्ववापिं दुजःत निगू खेमाय् खनेदुगु दु । पार्टी संस्थापन पक्षधर दुजःतय्सं एमाले अध्यक्ष झलनाथ खनालयात प्रधानमन्त्री दयेकेमाःगु बिचाः प्वंकूगु दु । नेतातय्सं माओवादी व कांग्रेस निगूलिं पार्टीयात छथाय् तयाः शान्ति प्रकृया व संविधान निर्माण यायेमाःगुलिं एमालें न्हूगु सरकारया नेतृत्व यायेमाःगु खँ धाःगु दु ।
अज्याःगु सरकारया नेतृत्व यायेत खनालया नांमय् सहमति जुइगु सम्भावना अप्वगुलिं वय्कयात प्रधानमन्त्रीया उम्मेदवार दयेकेमाःगु माग संस्थापन पक्षया दुसाः खनालया नेतृत्वय् न्हूगु सरकार गठन यायेगु खःसा पार्टीया प्रभावशाली नेता केपी शर्मा ओलीयात कार्यवाहक अध्यक्ष दयेकेमाःगु प्रस्ताव ओली पक्षधर दुजःतय्सं तःगु दु । थ्वस्वयां न्ह्यः ओली पक्षधर नेतातय्सं कांग्रेस नेतृत्वयात समर्थन यायेमाःगु अडान कयावयाच्वंगु खः ।
न्हूगु सरकारया बारे निर्णय यायेत मंगलवाः सुथय् १० बजे हानं केन्द्रीय कमिटीया बैठक च्वनीगु जूगु दु ।
