चिधंगु दलत सहमतिय सरकारया पक्षय्
संविधानसभाय् दुथ्याःगु चिचीधंगु दलतय्सं अझ नं सहमतिय आधारय् हे न्हूगु राष्ट्रिय सरकार गठन यायेमाःगु खँय् बः ब्यूगु दु । प्रमुख निगू दल एनेकपा (माओवादी) व नेपाली कांग्रेस बुहमतीय आधारय् जुसां थःथःगु नेतृत्वय् सरकार गठन यायेत लगे जुयाच्वंगु इलय् मंगलवाः नेकपा (माले)या संसदीय दलया ज्याकूथी च्वंगु १७गू दलया बैठकं बहुमतीय आधारय् गठन जुइगु सरकारं देय्या समस्या समाधान यायेमफइगु निष्कर्ष पिकासें सहमति पाखें हे सरकार गठन यायेगु कुतः यायेगु निष्कर्ष पिकाःगु दु ।
बैठकं प्रमुख स्वंगू दलत दथुइ प्रधानमन्त्रीया खँय् सहमति मजुसाः ल्यं दुगु २२गू दलया पाखें उम्मेदवारी दर्ता यायेगु बारे नं सहलह जूगु खः । चिचीधंगु दलं गु पार्टीयात समर्थन यायेगु वा थःगु हे उम्मेदावरी बीगु धइगु विषलय् मंगलवाः च्वनीगु बैठकं निर्णय याइगु जूगु दु ।
उखे माओवादी व कांग्रेसं धाःसा थौं नं थःथःगु नेतृत्वय् सरकार गठन यायेत थीथी दलया नेतात नाप सहलह याःगु दु । माओवादीं थौं माले, नेकपा (संयुक्त), नेपाल मजदुर किसान पार्टीयात समर्थन यायेत इनाप याःगु दुसाः कांग्रेसं नं माले लगायत पार्टी नाप सहलह यानाः न्हूगु सरकार गठनय् थःगु पार्टीयात समर्थनया निंतिं इनाप याःगु दु ।
