चीधंगु दललिसे माओवादी सहलह
येँ (सन्ध्या टाइम्स)/एकीकृत माओवादीं थःगु नेतृत्वय् सरकार दयेकेगु निंतिं संविधानसभाया चिचीधंगु दलया नेतातलिसे थौं नं सहलह ब्याकीगु जूगु दु ।
थःगु नेतृत्वय् दुईतिहाई बहुमतया सरकार दयेकेगु निंतिं धकाः माओवादीया नेतातय्सं थौं सहलह ब्याकेत्यंगु खः।
माओवादी नेतातय्सं म्हिगः नं माधव नेपालया नेतृत्वय् दुगु वर्तमान कामचलाउ सरकारय् दुमथ्याःगु झिगू चिचीधंगु दलया नेतातलिसे सहलह ब्याकूगु खः ।
सहलहया झ्वलय् चिचीधंगु झिगू दलं संघीयता, गणतन्त्र व धर्म निरपेक्षताया नेतृत्व माओवादीं यानाच्वंगुलिं आःया अवस्थाय् वहे संघीयता, धर्म निरपेक्षता व गणतन्त्र संस्थागत यानाः न्हूगु संविधान दयेकेमाःगु जुयाः माओवादीया नेतृत्वय् हे न्हूगु सरकार दयेकेमाः धकाः बः बियादीगु खः ।
अथे हे मधेशवादी दलत मधेशी जनअधिकार फोरम, फोरम लोकतान्त्रिक, सदभावना व तमलोपाया नेतातलिसे नं माओवादीया नेतातय्सं सहलह ब्याकादीगु खः।
