मधेशवादी दलत आयोगया विपक्षय्
येँ (सन्ध्या टाइम्स)/एकीकृत माओवादी, नेपाली कांग्रेस व एमालेया दथुइ सहमति जू कथं संविधान संशोधनया झ्वलय् हे राज्य पुनर्संरचना आयोग नं दयेकेगु धकाः कायम याःगु सहमतियात चिचीधंगु दल व मधेशवादी दलतय्सं अस्वीकार याना बिउगु दु ।
संविधान निर्माण सम्बन्धी कार्यतालिकाया झिंछक्वःगु संशोधन प्रस्तावया झ्वलय् स्वंगू दलं राज्य पुनर्संरचना आयोग दयेकेत तःगु प्रस्तावयात म्हिगः मेमेगु दलतय्सं अस्वीकार यायेवं कार्यतालिकाय् दुथ्याके मफुगु खः ।
मधेशवादी दल व चिचीधंगु दलतय्सं आयोग दयेकेगु ज्या संविधानसभाया मखु नापं आःया अवस्थाय् राज्य पुनर्संरचना आयोगया औचित्य हे समाप्त जुइ धुंकल धकाः दावी यानाः खँ तयेवं आयोग दयेकेगु खँ त्वःताः जक संविधानसभाया कार्यतालिका सर्वसहमतिं पारित याःगु खः ।
धाः कथं आः आयोग दयेकेगु ज्याया बारे छु यायेगु धकाः न्हूगु सरकारं बिचाः याइ धकाः नेतातय्सं धयादीगु दु ।
