प्रस्तावित न्याम्ह राजदूततय् नां सर्वसम्मत जुइमफुत
मन्त्रीपरिषदं प्रस्ताव यापिं न्याम्ह राजदुतत संसदीय सुनुवाइया विषेश समितिइ सर्वसम्मति जुइमफुत । संसदीय सुनुवाइ विषेश समितिया बिहिवाः च्वंगु बैठकय् प्रस्तावित न्याम्ह राजदुतत सर्वसम्मत जुइमफुसां बैठकं न्याम्हेसिया नां अनुमोदन याःगु दु । संसदीय सुनुवाइ विशेष समितिं अनुमोदन याःगुलिं राजदुत नियुक्तिया निंतिं सरकारया लँपू चाःगु दु ।
मन्त्रीपरिषदं जर्मनीय् सुरेश प्रधान, अमेरीकाय् सुकदेश शाह, बेलायतय् रामस्वार्थ राय, भारतय् चन्द्रकान्त पौडेल व फ्रान्सय् सुरेन्द्र कार्कीया नां सिफरिस याःगु खः ।
बैठकय् राजदूततय् नां सर्वसम्मत जुइ मफुसां गुलिखें सभासदतय्सं समर्थन याःगुलिं प्रस्तावित नां त अनुमोदन जूगु खः । न्ह्यछम्ह दुजः दुगु थुगु समिति छम्ह जकः सभासदं समर्थन याःसां नां अनुमोदन जुइगु प्रावधान दु ।
अमेरीकाया निंतिं सिफारिस याम्ह शाहयाके ग्रीनकार्ड दुगुलिं अधिकांश सभासदतय्सं अनुमोदन यायेमज्यूगु बीचाः तःगु खः । अथेहे जर्मनया निंतिं सिफरिस याम्ह प्रधानया नांमय् प्रधानमन्त्रीया सल्लाहकारं हे उजुरी तःगुलिं विशेष छानविन यायेमाःगु माग सभासदतय्सं याःगु खः । अथेहे फ्रान्स, बेलायत व भारत कुटनीतिक हिसावं नेपाःया 'क श्रेणी' लाःगु देत जुगुलिं आः प्रस्तावित राजदूतत स्वयां योग्य राजदूतत छ्वयेमाःगु माग सभासदतय्सं याःगु खः । तर दक्व प्रस्तावित राजदूतयात समर्थन याईपं सभासदत नं दुगुलिं न्यागुलिं नांया बैठकं अनुमोदन याःगु दु ।
