रेकी ध्यान शिविरया उलेज्या
येँ (सन्ध्या टाइम्स)/नेपाल रेकी ध्यान केन्द्रया ग्वसालय् जूगु रेकी शिविर सभासद् हितमान शाक्यं उलेज्या यानादिल ।
ज्याझ्वलय् न्ववायेगु झ्वलय् सभासद् शाक्यं रेकी छगू तसकं सरल व म्हो ध्यबां नं ततःधंगु ल्वय्त लायेके फइगु प्राकृतिक चिकित्सा खः धासें राज्यं थुगु प्राकृतिक चिकित्सा विधियात प्रोत्साहन बिया वनेमाःगु खँ कनादिल ।
अथे हे सभापति नापं रेकीया संस्थापक नायः रेकी ग्राय्न्ड मास्टर लामा तामाङ्ग रिब्जिनं रेकी चिकित्साया छ्यलाबुला न्हापांनिसें जुया वयाच्वंगु व थुकियात थम्हं हे थुइकाः यायेमाःगु खँ कनादिल ।
उगु ज्याझ्वलय् डा. मनमोहन श्रेष्ठ, केशरी घले, रविन्द्र श्रेष्ठ, उर्मिला गिरि, माया चौरसिया, बलध्वज खड्का, सुजना थापा, विष्णु महत, निर्मल बज्राचार्यपिंसं नं रेकीया महत्व बारे थम्हं याना वयागु थीथी ल्वय्या बारे कनादिल।
उगु हे ज्याझ्वलय् अष्टेलियाया मार्टी डोनेली व जर्मनीया लियां नं थःपिनि अनुभव कनादिल ।
ज्याझ्वलय् रेकी केन्द्रया न्वकु रजनी मल्लीं लसकुस यानादीगु खःसा सावित्री सिन्हां सुभाय् बियादीगु खः ।
