भट्टराई जनता दथुइ लोकप्रिय : रायमाझी
एकीकृत नेकपा (माओवादी)या स्थायी समिति दुजः टोपबहादुर रायमाझीं माओवादी उपाध्यक्ष डा. बाबुराम भट्टराई जनता दथुइ लोकप्रिय जूगुलिं वय्कया नेतृत्वया न्हूगु सरकारय् सहमति जुइगु विश्वास प्वंकादीगु दु ।
रिपाटर्स क्लबं सोमवाः येँय् याःगु छगू साक्षात्कार ज्याझ्वःलय् नेता रायमाझीं भट्टराईया नांमय् सहमति जुसाः पार्टी भट्टराईया नेतृत्वय् बुहमतीय आधारय् सरकार गठन यायेत तयार जुइगु धयादिल । वय्कलं सरकारया नेतृत्वया बारे राजनीतिक दलत दथुइ सहमति मजुसाः कन्हय् माओवादीं थःगु पार्टीया उम्मेदवार दर्ता याइगु धयादिल ।
माधवकुमार नेपालया सरकारयात समर्थन यायेगु व कांग्रेस उपसभापति रामचन्द्र पौडेल नेतृत्वया सरकारयात समर्थन यायेगुली छुं भिन्नता मदइगु धयादिसें कांग्रेसया उम्मेदवारयात समर्थन मयायेगु धयादिल ।
ज्याझ्वःलय् कांग्रेस सहमहामन्त्री डा. रामशरण महतं कांग्रेस उपसभापति पौडेल नेतृत्वया सरकारय् सहमति जुइगु धयादिलसाः नेकपा (एमाले)या नेता केशव बडालं एमालें पार्टी अध्यक्ष झलनाथ खनालयात प्रधानमन्त्रीया निंतिं उम्मेदवार दयेकीगु धयादिल ।
अथेहे तराई मधेश लोकतान्त्रिक पार्टीया नेता वृजकुमार गुप्तां प्रमुख स्वंगू दलया कारणं प्रधानमन्त्रीया जिम्मा मधेशवादी दलयात वःगु धयादिसें मधेशी मोर्चां तमलोपाया अध्यक्ष महन्त ठाकुरयात प्रमया उम्मेदवार दयेकीगु धयादिल ।
