थः हे प्रम जुइगु पौडेलया दावी
येँ (सन्ध्या टाइम्स)/नेपाली कांग्रेस संसदीय दलया नेता रामचन्द्र पौडेलं थःहे प्रधानमन्त्री जुइगु निश्चित दु धकाः दावी यानादीगु दु। थौं सुथंनिसें थीथी पार्टीया नेतातय्त नापलानाः थःत समर्थन यायेत इनाप यायेगु झ्वलय् वय्कलं थ्व खँ धयादीगु खः ।
वय्कलं थौं सुथय् नेपाल मजदुर किसान पार्टीया अध्यक्ष नारायणमान बिजुक्छेँया ख्वपय् च्वंगु छेँय् हे वनाः नापलानाः थःत समर्थन यायेत इनाप यानादीगु खः। उगु इलय् सहलह ब्याकेगु झ्वलय् नेता बिजुक्छे सकारात्मक हे जूगु खँ नं भाजु पौडेलं संचारकर्मीतय्त कनादीगु दु। वय्कलं थः हे प्रधानमन्त्री जुइगु खँय् निश्चित दु धकाः तकं संचारकर्मीततय्त धयादीगु दु ।
म्हिगः च्वंगु कांग्रेसया केन्द्रीय कमिटीया मुँज्यां संसदीय दलया नेता पौडेलयात सर्वसहमति कथं प्रधानमन्त्रीया निंतिं उम्मेदवार थनेगु धकाः क्वःछीधुंकाः थनिंनिसें हे वय्कः थीथी राजनीतिक दलया नेतातलिसे सहलह ब्याकेगु ज्याझ्वः न्ह्याकादीगु खः ।
