गथु प्याखं आकिवं जक

येँ (सन्ध्या टाइम्स)/झिंनिदँय् छक्वः पिहां वइगु पचली भैरवया खड्ग सिद्धि जात्रा (गथु प्याखं) थुगु दँय् पिहां वयेमाःगु खःसां आः आकिवं जक पिहां वइगु जूगु दु ।

हिसाबं थ्व प्याखं थुगु दँय् पिहां वयेमाःगु खः। तर न्हापाया झिंनिदँय् पिहां वःगु जात्रा दछि न्ह्यकयाः वःगु जूगुलिं उकियात हे मिलान याये कथं थुगुसी दछि लिपा जक पिकायेगु धकाः निर्णय जूगु खँ सीदुगु दु ।

थ्व जात्राय् पचली भैरवं हनुमानध्वाखाय् वयाः जुजुलिसे खड्ग हिलेमाःगु परम्परा दु। तर नेपालय् राजतन्त्र मदयेधुंकूगु कारणं आः सुयालिसे खड्ग हिलेगु धइगु खँय् प्याखं पिकाइगु गुथि दुने विवाद पिहां वःगु खँ सूत्रं धाःगु दु। राष्ट्रपतिलिसे खड्ग हिलेबलय् धार्मिक अनुष्ठानय् बाधा जुइगु खः लाकि धइगु खँय् नं गुथि दुने सहलह जूगु खः। अथे खःसां दछि मिलान यायेत आः आकिवं प्याखं पिकायेगु निर्णय जूगु खः ।

थ्व प्याखं पिकायेत गथांमुगः कुन्हु जुजुयाथाय् ग्वय्दां तयाः प्याखं पिहां वइगु जानकारी बीगु चलन दु ।