नेवाः जागरण मञ्चया निदँ बुन्हि
येँ (सन्ध्या टाइम्स)/नेवाः जागरण मञ्चया निदँ बुन्हि शुक्रवाः छगू ज्याझ्वः यासें न्यायेकल। जनकवि दुर्गालाल श्रेष्ठ मूपाहां कथं झाःगु उगु ज्याझ्वलय् थीथी वक्तातय्सं जागरण मञ्च निदँ फुनाः स्वदँय् क्यंगु लसताय् भिंतुना बियादीगु खः ।
ज्याझ्वलय् न्ववासें नेवाः स्वायत्त राज्य मंकाः संघर्ष समितिया नायः मंगल महर्जनं येँ महानगरपालिकाय् नेवाः स्वायत्त राज्यया अवधारणा कथं ज्या याकेगु ताः तयाः संघर्षया ज्याझ्वः न्ह्याकाच्वनागु खँ कनादिल ।
एनेकपा (माओवादी)या सभासद् हिसिला यमिं कन्हय् संघीय प्रणाली, धर्म निरपेक्षता आदि थेंज्याःगु सवालय् सहमति जुइमा धकाः हे थौं सहमतिया सरकार दयेकेमाः धइगु सः तयाच्वनागु खँ कनादिल। नेकां सभासद् तीर्थराम डंगोलं नेवाःतय्त छप्पँ यायेगु ज्याय् नेवाः जागरण मंचं गहन भूमिका म्हिताच्वंगु खँ कनादिल। नेपाः राष्ट्रिय पार्टीया सभासद् बुद्ध साय्मिं नेवाः स्वायत्त राज्य वयेत अझ नं थाकुनिगु कारणं नेवाःत अझ सचेत जुइमाःगु खँ कनादिल ।
ज्याझ्वलय् एमालेया केन्द्रीय दुजः राजेन्द्र श्रेष्ठ, कृष्णगोपाल श्रेष्ठ, नेपाल वायुसेवा निगमया कार्यकारी अध्यक्ष सुगतरत्न कंसाकार, नेपाल समाचारपत्र न्हिपौया सम्पादक पुष्कर लाल श्रेष्ठ, मंकाः संघर्ष समिति स्थायी समितिया कजि मल्ल के. सुन्दर, नांजाःम्ह हास्य कलाकार मदन कृष्ण श्रेष्ठपिंसं नं भिंतुना बियादीगु खः।
सभापतिया थासं न्ववासें नेवाः जागरण मञ्चया संयोजक सुजीव वज्राचार्यं नेवाः ज्याझ्वः यायेत आर्थिक समस्या मवयेकेगु लागिं नेवाः जागरण कोष नीस्वनागु जानकारी बियादिल ।
