पौडेलयात मधेशया समर्थन?
येँ (सन्ध्या टाइम्स)/नेपाली कांग्रेसं रामचन्द्र पौडेलयात थःगु पार्टी पाखें प्रधानमन्त्रीया उम्मेदवार दयेकेगु निर्णय यायेवं उकियात मधेशवादी दलतय्सं सकारात्मक रुपं काःगु दु। म्हिगः जूगु छगू साक्षात्कार ज्याझ्वलय् न्ववासें मधेशवादी दलया नेतातय्सं थ्व बिचाः प्वंकूगु खः ।
ज्याझ्वलय् न्ववासें तमलोपाया महामन्त्री महेन्द्र यादवं कांग्रेसं रामचन्द्र पौडेलयात प्रधानमन्त्रीया उम्मेदवार दयेकूगुलिं वय्कःयात मधेशवादी दलतय्सं नं समर्थन यायेफुगु बिचाः प्वंकादिल ।
वय्कलं थःगु पार्टीया अध्यक्ष महन्थ ठाकुरयात थःपिंसं गनं नं प्रधानमन्त्रीया रुपय् प्रस्तावित यानागु मदु धासें थ्व ला माओवादीं मधेशी दल दथुइ फुट हयेत याःगु प्रचार जक खः धयादिल ।
फोरम (लोकतान्त्रिक)या महामन्त्री जितेन्द्र देवं लोकतन्त्र व मधेशवादयात संवोधन यायेफुम्ह नेतायात थःपिंसं समर्थन यायेगु खँ कनादिल ।
मधेशी फोरमया महामन्त्री रामसहाय यादवं थःपिं अझ नं बहुमतीय सरकारया पक्षय् मदु धयादिल ।
