माओवादीं नं सहलहयात तीव्रता बिल
थःगु हे पार्टीया नेतृत्वय् न्हूगु सरकार गठन यायेगु निंतिं एकीकृत नेकपा (माओवादीं) सहलहयात तीव्रता ब्यूगु दु । नेपाली कांग्रेसं सहलह न्ह्याकाच्वंगु इलय् हे माओवादीं नं थीथी दलया नेता नापलाना थःगु दलयात समर्थन यायेत इनाप याःगु दु ।
आइतवाः मधेशी मोर्चा नाप आबद्ध प्यंगूलिं दलत तराई-मधेश लोकतान्त्रिक पार्टी, मधेशी जनअधिकार फोरम, मधेशी जनअधिकार फोरम (लोकतान्त्रिक) व सद्भावना पार्टीया नेतातय्त नपलाना थःत समर्थन यायेत इनाप याःगु दु । उगु इलय् मधेशी दलतय्सं मधेशीया माग प्रति गुगु दल अप्व सकारात्मक जुइ उगु हे दलयात थःपिंसं समर्थन यायेगु खँ धासें मधेशीतय् मागयात सम्बोधन याःसा माओवादीयात समर्थन यायेगु खँ धाःगु दु ।
बैठक लिपा माओवादी उपाध्यक्ष नारायणकाजी श्रेष्ठ 'प्रकाशं' मधेशवादी दलतय् माग प्रति माओवादी सकारात्मक जूगु कनादिसें मधेशीतय् माग अप्व सम्बोधन याःगु माओवादी हे जूगुलिं मधेशी मोर्चां माओवादीयात हे समर्थन याइगु दावी यानादिल ।
थौं हे माओवादीं वर्तमान सरकार पिने च्वनाच्वंगु झिगू दलया नेतात नाप नं सहलह यानाः थःगु दलयात प्रधानमन्त्रीया निंतिं समर्थन यायेत इनाप याःगु दु । बैठकय् ब्वति काःगु दलतय्सं माओवादीया हे नेतृत्वय् न्हूगु सरकार गठन जुइमाःगु खँय् बः ब्यूगु जानकारी माओवादी उपाध्यक्ष डा. बाबुराम भट्टराईं बियादिल ।
