विराटनगरय् निगू माओवादी पुचः दथुइ ल्वापु
सत्तारुढ एकीकृत नेकपा माओवादी व उगु पार्टीं विद्रोह यानावंगु मातृका यादवया पुर्नगठित माओवादी दथुइ बुधवाः बहनी विराटनगरय् ल्वापु जूगु दु ।
संविधान सभा उप निर्वाचनया झ्वलय् एकीकृत माओवादीं आचार संहिता उल्लंघन याःगु धासें विद्रोही माओवादी पुचःलं आक्रमण याःगु खः । ल्वापू जुया विराटनगर बजारय् बिहिवाः सुथय्निसें तनाव जुयाच्वंगु दु । प्रहरीं आः अन कफ्र्यु तयेगु तयारी यानाच्वंगु दु ।
प्रहरी धाः कथं निगू पुचः दथुइ ल्वापू जुवलय् गोली तकं चले जूगु धाःगु दु । उखे एकीकृत माओवादीं धासाः मातृका पुचलं गोली चलेयाःगु दावी याःगु दु । बुधवाः बहनी निसें उप निर्वाचनया प्रचार प्रसार याये मदुसां एकीकृत माओवादीं प्रचार जारी याःगु द्वपं विद्रोही माओवादीं ब्यूगु दु ।
अथेहे थःगु प्यम्ह कार्यकर्तायात विद्रोही माओवादीं अपहरण याःगु द्वपं एकीकृत माओवादीं ब्यूगु दु । ल्वापूइ लानाः झिंगुम्ह घाःपाः जूगु दुसाः उकी मध्ये निम्हेसित गोलीं लाःगु दु ।
