प्रमया नेतृत्व बारे एमालें कन्हय् निर्णय याइगु
प्रधानमन्त्री पदया निंतिं संसदय् निर्वाचन जुइत स्वन्हु जक ल्यं दुगु इलय् नेकपा (एमालें) प्रधानमन्त्रीया नेतृत्व बारे कन्हय् निर्णय याइगु जूगु दु ।
आइतवाः एमाले मू ज्याकू बल्खुइ च्वंगु स्थायी समितिया बैठकं प्रधानमन्त्रीया बारे निर्णय यायेगु जिम्मा केन्द्रीय कमिटीयात ब्यूगु दु । एनेकपा (माओवादी) व नेपाली कांग्रेसं प्रधानमन्त्रीया निंतिं दावी यायेधुंकूगु इलय् सोमवाः च्वनीगु केन्द्रीय समितिया बैठकं प्रधानमन्त्री पदया निंतिं मेगू पार्टीयात समर्थन यायेगु वा थःगु हे नेतृत्वय् न्हूगु सरकार गठन यायेगु बारे निर्णय याइगु ज्याझ्वः दु । माओवादी व कांग्रेस नापं प्रधानमन्त्री पदया निंतिं एमालें नं दावी याइगु सम्भावना दुगु खँ धाःगु दु ।
कांग्रेसं पार्टी उपसभापति रामचन्द्र पौडेलया नेतृत्वय् सरकार गठन यायेगु निर्णय यायेधुंकूगु दुसाः माओवादीं नं थःगु हे पार्टीया नेतृत्वय् सरकार गठन यायेगु निर्णय याःसां नेतृत्वया विकल्प धाःसा खुल्ला तःगु दु । निगूलिं पार्टीं थःथःगु नेतृत्वय् न्हूगु सरकार गठन यायेत मेमेगू दलनाप सहलह तीव्र रुपं न्ह्याकाच्वंगु दु ।
