प्रम जुइत पौडेल सक्रिय
नेपाली कांग्रेसं न्हूगु गठन जुइगु सरकारया निंतिं थःगु पार्टी पाखें संसदीय दलया नेता रामचन्द्र पौडेलया नांमय् सहमति प्वंकेवं पौडेल प्रधानमन्त्री जुइत सक्रिय जुयादीगु दु ।
कांग्रेसं सहमति याःगु कन्हय् कुन्हु हे पौडेलं मधेशवादी प्यंगू दल तराई-मधेश लोकतान्त्रिक पार्टी, मधेशी जनअधिकार फोरम, मधेशी जनअधिकार फोरम (लोकतान्त्रिक) व सद्भावना पार्टीया नेतातय्त नपलाना थःत समर्थन यायेत इनाप यानादीगु दु । वय्क नापं कांग्रेस कार्यवाहक सभापति सुशिल कोइराला लगायत नेतात नं वनाः मधेशी दलतय्त थःगु पक्षय् कायेगु कुतः याःगु खः ।
अथेहे थौं हे पौडेलं नेपाल मजदुर किसान पार्टीया अध्यक्ष नारायणमान बिजुक्छेयात नापलाना प्रधानमन्त्रीया निर्वाचनय् कांग्रेसयात ग्वाहालि यायेत इनाप यानादीगु खः । उगु इलय् बिजुक्छें कांग्रेसया नीति स्वयाः जक समर्थन यायेगु वा मयायेगु धइगु बारे सहमति प्वंकेफइगु धयादिल ।
पौडेलं थौं हे नेकपा (एमाले)या प्रभावशाली नेता केपी शर्मा ओलीयात नं नापलाना थःत प्रधानमन्त्रीलय् समर्थन यायेत ग्वाहालि फ्वनादीगु खः ।
