राज्य पुनर्संरचना आयोग प्रति चिचीधंगु दलया विरोध
संविधानसभाय् दुथ्याःगु चिचीधंगु दलंतय्सं प्रमुख स्वंगू दलं राज्य पुनर्संरचना आयोग गठन यायेत प्वंकूगु सहमति प्रति विरोध याःगु दु ।
संविधानसभाया अध्यक्ष सुवासचन्द्र नेम्वाङं संविधानसभाया न्हूगु कार्यतालिका बारे जानकारी बीत सःतुगु २५गू दलया बैठकं चिचीधंगु दलं स्वंगू प्रमुख दलं चिधंगु दलत नाप सहलह हे मयासें आयोग गठन यायेत सहमति प्वंकूगु धासें विरोध प्वंकूगु खः । अथेहे मधेशवादी दलतय्सं नं संविधानसभा अन्तर्गतया राज्य पुनर्संरचना व राज्य शक्तिया बाँडफाँड समितिं राज्य पुनर्संरचनाया मस्यौदा पेश यायेधुंकूगुलिं आयोग गठन यायेगु आवश्यक मदुगु खँ धाःगु दु ।
उगु बैठकय् संविधानसभाया अध्यक्ष नेम्वाङं संविधानसभाया न्हूगु कार्यतालिकाया बारे जानकारी बियादीगु खः । न्हूगु कार्यतालिका कथं साउन दुने प्रारम्भिक मस्यौदाय् दुगु विवाद चीकेगु उगु ई दुने नं विवाद मज्यंसाः भदौ १५ दुने भोटिङ यानाः जुसां संविधान निर्माण प्रकृया न्ह्याकेगु व चैत दुने संविधान निर्माण यायेगु ज्याझ्वः दु ।
