चलखं ल्हानाः स्वम्ह सित

येँ (सन्ध्या टाइम्स)/मदिक्क वा वयाच्वंगुलिं थौं वंगु चान्हय् बाग्लुङया देविस्थान गाविस वडा नं. ७ या व्याङ्ग्री धाःगु लागाय् वंगु चलखं ल्हानाः छखा हे छेँया स्वम्ह मनू सीगु दुसा मेपिं प्यम्ह घाःपाः जूगु दु ।

घाःपाः जूपिं नं वहे छेँया दुजःत खः। उगु घटनाय् लानाः छम्ह मनू तसकं घाःपाः जूगु दु। बाग्लुङया भिमबहादुर विकया छेँ चलखं ल्हानाः अथे मनूत सीगु खः। चलखं ल्हानाः विकया १३ दँ दुम्ह म्ह्याय् शान्ति, ६ दँ दुम्ह काय् कृष्ण व १२ दँ दुम्ह काय् शिव सीगु खः। चलखं ल्हानाः २५ दँ दुम्ह म्ह्याय् भूमि व ३ दँ दुम्ह छय् शुशिला, २२ दँ दुम्ह भौमचा मनिषा व स्वयं भीमबहादुर विक नं घाःपाः जूगु दु ।

वय्कःया छम्ह काय् कुवेर विक धाःसां छेँनं पिने लानाच्वंगुलिं सकुशल दुगु खँ प्रहरीं धाःगु दु। वहे चलखय् लानाः घाःपाः जूपिं प्यम्हेसित वासः यायेगु ज्या स्थानीय स्वास्थ्य चौकीइ जुयाच्वंगु दु। चलखं ल्हानाः भिमबहादुरया छेँ पूर्ण रुपं हे ध्वस्त जूगु दुसा उगु घटनाय् लानाः घाःपाः जूपिंत स्थानीय मनूत नापं प्रहरी जानाः उद्धार याःगु खः ।