बहुमतीय सरकार मजिउ: एमाले
येँ (सन्ध्या टाइम्स)/नेकपा (एमालें) आःया अवस्थाय् बहुमतीय सरकार प्रत्युत्पादक जुइगु ठहर याःगु दु।
एमालेया अध्यक्ष झलनाथ खनाल, प्रधानमन्त्री माधव नेपाल, गृहमन्त्री भीम रावल व अर्थमन्त्री सुरेन्द्र पाण्डे नापं मेमेपिं नेतातय्गु दथुइ जूगु सहलहं थज्याःगु निष्कर्ष पिकाःगु खँ धाःगु दु ।
एमालेया मुख्य सचेतक भीम आचार्यया येँय् च्वंगु छेँय् एमालेया वरिष्ठ नेतातय्गु दथुइ उगु सहलह जूगु खः। वय्कःपिंसं आः सहमतीय सरकारया विकल्प मदु धकाः तकं निष्कर्ष पिकाःगु दु ।
बैठक लिपा सचेतक आचार्यं सहमतिया सरकार दयेकेगु निंतिं थःपिंसं कुतः यायेगु जुइ धयादिल। 'बहुमतीय सरकार दयेकल धाःसा प्रत्युत्पादक जुइ' मुख्य सचेतक आचार्यं धयादिल, 'सहमतिया हे आधारय् न्हूगु सरकार दयेकेमाः धइगु जिमिगु निष्कर्ष खः ।'
आः एमालें अध्यक्ष झलनाथ खनालया नेतृत्वय् राष्ट्रिय सहमतीय सरकारया निंतिं एकीकृत माओवादी, नेपाली कांग्रेस नापं मेमेगु दलया नेतातलिसे नं सहलह ब्याकी धाःगु दु ।
