चैत्र दुने संविधान च्वये सिधयेकीगु
येँ (सन्ध्या टाइम्स)/राज्य पुनर्संरचनाया खाका तयार यायेत गठन यायेत्यंगु राज्य पुनर्संरचना आयोग मेमेगु निकायय् थें भागबन्डाया लिधंसाय् मनू नियुक्त मयायेगु सहमति स्वंगू तःधंगु राजनीतिक दलतय् दथुइ जूगु दु। बरु थुकियात आदिवासी जनजाति, दलित व मिसा दुजःत दुथ्याकाः समावेशी दयेकेगु खँय् धाःसा सहमति जूगु दु।
म्हिगः च्वंगु स्वंगू तःधंगु दलया बैठकं आः वइगु साउन १५ गतेनिसें आयोगं ज्या शुरु यायेगु कथं सहमति दयेकूगु दु ।
यदि थ्व आयोगं साउन १५ गते ज्या शुरु यात धाःसा असोज १५ गते थ्वं थःगु प्रतिवेदन लःल्हायेमाःगु जुइ।
राज्य पुनर्संरचना आयोग गठनया नापनापं संविधान निर्माणया कार्यतालिका नं तयार यायेगु खँय् नं दलतय् दथुइ सहमति जूगु दु। लिसें आः संविधान च्वयेगु न्हापा उकुन्हु गन क्वचाःगु खः अनंनिसें शुरु यायेगु व बाँकी दुगु ज्या फुक्क चैत्रया दुने क्वचायेकेगु सहमति नं जूगु दु। वंगु जेष्ठ १४ गते संविधानसभाया म्याद दछि थपे याःगु जूगुलिं आकिवंया जेठ १४ गते न्ह्यः हे संविधान च्वयेगु ज्या क्वचायेकेमाःगु जुइ ।
संविधान च्वयेगु कार्यतालिका स्वंगुलिं दलया प्रतिनिधित च्वनाः तयार यायेगु निर्णय नं दलतय्सं याःगु दु ।
