भ्वाथःगु गाडी दुने क्षयरोगया सेवा
ख्वप (सन्ध्या टाइम्स)/ख्वप नपां न्ह्याकाच्वंगु जनस्वास्थ्य केन्द्रं बिया वयाच्वंगु क्षयरोगया 'डट्स' सेवा थौंकन्हय् च्याम्हसिंहया ख्वप बहुप्राविधिक अध्ययन संस्थानया न्ह्यःने च्वंगु ख्यलय् ज्या लगे मजुयाः दिकातःगु छगः गाडी दुनं हे बिया वयाच्वंगु दु ।
ख्वप नपां न्ह्याका वयाच्वंगु कमलविनायकया जनस्वास्थ्य केन्द्रयात च्याम्हसिंहया ख्वप बहुप्राविधिक अध्ययन संस्थानया भवनय् ल्ह्यया यंकेवं लछि ति न्ह्यःनिसें नगरपालिकां उगु सेवा आः संस्थानया ख्यलय् स्यनाः वांछ्वया तःगु बा. ३ च ५३७९ नम्बरया भ्वाथःगु गाडी दुने च्वनाः चले यानाच्वंगु खः। सुथय् ७ निसें ११ बजे तक अनं सेवा बीगु खँ सामुदायिक स्वास्थ्यकर्मी दिनेश कक्षपतिं कनादिल ।
'गाडी दुने तसकं हे ज्या मछिं, बिरामीयात सेवा बीत हे थाकु' कक्षपतिं कन। न्हिं १५ निसें २० म्हेसित तक क्षयरोगया वासः बियाच्वनागु खँ न्ह्यथँसें कक्षपतिं बिरामीतय्सं नं मचाःमगाः महसुस यानाच्वंगु कनादिल। 'लछि न्ह्यः हे संस्थानयात ब्यवस्थित थाय् मिले याना बीत इनाप यानागु खः, तर सुनुवाई मजू।' वय्कःया गुनासो दु ।
थ्व सन्दर्भय् ख्वप बहुप्राविधिक अध्ययन संस्थानया प्राचार्य गणेशराम न्हेम्हाफुकीयाके न्यनाबलय् उगु सेवायात ब्यवस्थित तरिकां न्ह्याकेगु निंतिं संस्थानया मू गेट लिक्क हे टहरा छगू दयेकेगु प्रक्रिया न्ह्यानाच्वंगु जानकारी बियादिल। 'फुक्कं प्रक्रिया क्वचाल, नगरपालिकां नक्सा पास यायेवं हे टहरा दयेकेगु जुइ' न्हेम्हाफुकीं कनादिल। क्षयरोग सरुवा ल्वय् जूगुलिं थ्व सेवायात संस्थानया भवन दुनं बीगु स्वयां पिनं हे बीगु इलय् थप जोखिम मवइगु कनादिसें न्हेम्हाफुकीं सेवायात दिके मजिउगु कारणं जक अस्थायी रुपं गाडी दुनं जूसां सेवा न्ह्याकाच्वनागु खँ कनादिल ।
